ເຂົ້າຮ່ວມເປັນອາສາສະໝັກສັດຕະວະແພດສັດປ່າກັບພວກເຮົາ
ທາງສູນພວກເຮົາມອບໂອກາດພິເສດໃຫ້ຜູ້ຊ່ຽວຊານສັດຕະວະແພດ ແລະ ນັກສຶກສາໃຫ້ໄດ້ຮັບປະສົບການຕົວຈິງໃນການເບິ່ງແຍງຮັກສາສັດປ່າ. ອາສາສະໝັກຈະໄດ້ເຮັດວຽກຮ່ວມກັບທີມງານສັດຕະວະແພດຂອງພວກເຮົາ, ຊ່ວຍເຫຼືອການປິ່ນປົວທາງການແພດ, ກວດເຊັກສຸຂະພາບສັດ, ກວດເຊັກຮ່າງກາຍສັດຕາມປົກກະຕິ, ສັງເກດສະຫວັດດີການສັດ ແລະ ອື່ນໆ. ໂຄງການນີ້ໃຫ້ຄວາມເຂົ້າໃຈອັນເລິກເຊິງກ່ຽວກັບການປິ່ນປົວ ແລະ ການອະນຸລັກສັດປ່າໃນລາວ ພ້ອມທັງມີສ່ວນສະໜັບສະໜູນໂດຍກົງຕໍ່ຊີວິດການເປັນຢູ່ຂອງສັດທີ່ໃກ້ຈະສູນພັນ.
ປະສົບການ ການເປັນອາສາສະໝັກສັດຕະວະແພດ ຂອງພວກເຮົາ:
ມີຄວາມຍືດຫຍຸ່ນ, ການຮຽນຮູ້ ແລະ ສ້າງຄວາມເຂັ້ມແຂງໃນທ້ອງຖິ່ນ
ໃນຖານະທີ່ເປັນອາສາສະໝັກສັດຕະວະແພດ ວັນຂອງທ່ານອາດປ່ຽນແປງໄດ້ທັນທີ. ທ່ານອາດກຳລັງກວດເຊັກອາຈົມສັດຕາມປົກກະຕິຢູ່ດີໆ ກໍ່ຖືກເອີ້ນໃຫ້ໄປປະເມີນສັດທີ່ມີອາການງ່ວງຊຶມຢ່າງກະທັນຫັນ ຫລື ກະກຽມການກວດເຊັກຮ່າງກາຍສັດທີ່ມາຈາກການກູ້ໄພທີ່ບໍ່ຄາດຄິດ. ການເຮັດວຽກຢູ່ໃນໂຮງໝໍສັດປ່າຂອງພວກເຮົາເຮັດໃຫ້ທ່ານມີຄວາມກະຕືລືລົ້ນ ດັ່ງນັ້ນ, ຄວາມຍຶດຫຍຸ່ນ ແລະ ຄວາມສາມາດໃນການປັບຕົວໄດ້ງ່າຍຈຶ່ງເປັນສິ່ງສຳຄັນ!
ແທບຈະເປັນໄປບໍ່ໄດ້ເລີຍ ທີ່ຈະຄາດເດົາໄລຍະເວລາທີ່ແນ່ນອນໃນແຕ່ລະວັນຂອງທ່ານ ເນື່ອງຈາກວ່າບໍ່ມີສອງສິ່ງທີ່ຄືກັນ. ພວກເຮົາຂໍຮັບປະກັນວ່າ ບໍ່ວ່າທ່ານຈະຊ່ວຍເຫຼືອໃນການຜ່າຕັດ, ກວດເຊັກຮ່າງກາຍສັດຕາມປົກກະຕິ, ເຝົ້າສັງເກດເບິ່ງສັດທີ່ປະຈຳຢູ່ໃນສູນນີ້, ຮັບປະກັນໂຮງໝໍຂອງພວກເຮົາໃຫ້ໄດ້ມາດຕະຖານສູງ ຫລື ປ້ອນຂໍ້ມູນການແພດເຂົ້າໃນ ZIMS, ທຸກການສະໜັບສະໜູນຂອງທ່ານຕໍ່ LCTW ນັ້ນມີຄຸນຄ່າຢ່າງຍິ່ງ.
ພວກເຮົາມີຄວາມພາກພູມໃຈເປັນຢ່າງຍິ່ງໃນການສົ່ງເສີມການພັດທະນາວິຊາຊີບ ແລະ ສ້າງຄວາມເຂັ້ມແຂງໃຫ້ແກ່ນັກວິຊາຊີບລາວ. ອາດມີບາງມື້ທີ່ສັດຕະວະແພດຕ່າງປະເທດຂອງພວກເຮົາບໍ່ທັນ ແລະ ສັດຕະວະແພດລາວຂອງພວກເຮົາຈະມາເປັນຜູ້ນຳແທນ. ຕົວຢ່າງເຫຼົ່ານີ້ຈະມອບໂອກາດການຮຽນຮູ້ອັນເປັນເອກະລັກໃຫ້ແກ່ທ່ານ ເພື່ອພັດທະນາທັກສະການສື່ສານ ແລະ ການເຮັດວຽກເປັນທີມ ພ້ອມທັງສະໜັບສະໜູນພາລະກິດຂອງພວກເຮົາ ເພື່ອຍົກລະດັບຄວາມຊ່ຽວຊານໃນທ້ອງຖິ່ນໃນການລ້ຽງດູສັດປ່າ.
ພວກເຮົາຍັງເຊື່ອວ່າຄວາມເຂົ້າໃຈໃນການລ້ຽງດູສັດເປັນສິ່ງສຳຄັນສຳລັບການເບິ່ງແຍງຮັກສາທາງສັດຕະວະແພດຢ່າງມີປະສິດທິພາບ. ນັ້ນເປັນເຫດຜົນທີ່ວ່າໃນແຕ່ລະອາທິດ ທ່ານຈະໄດ້ເຮັດວຽກຮ່ວມກັບທີມງານລ້ຽງສັດຂອງພວກເຮົາ, ຮຽນຮູ້ວິທີການລ້ຽງດູສັດ, ຮຽນຮູ້ລັກສະນະພິເສດຂອງສັດແຕ່ລະຊະນິດ ແລະ ທຳຄວາມເຂົ້າໃຈວ່າການລ້ຽງດູສັດທີ່ຖືກຕ້ອງສາມາດຊ່ວຍປ້ອງກັນບໍ່ໃຫ້ເກີດພະຍາດ ແລະ ຄວາມເຈັບປ່ວຍ.
